Verða að fá nægan aðlögunartíma og tungumálakennslu

Formaður Félags hjúkrunarfræðinga gerir ekki athugasemdir við að til standi að ráða fleiri hjúkrunarfræðinga erlendis frá á Landspítalann svo framarlega sem hlutfall þeirra verði ekki of hátt og þeir fái nægan tíma til aðlögunar og góða íslenskukennslu.

Greint var frá því í fréttum Stöðvar 2 í gær að Landspítalinn hefði sagt upp samningum við tvö íslensk þjónustufyrirtæki sem hafa séð Landspítalanum fyrir um 30 hjúkrunarfræðingum. Fram kom í máli Önnu Stefánsdóttur, hjúkrunarforstjóra Landspítalans, að til stæði að auglýsa eftir erlendum hjúkrunarfræðingum í staðinn þar sem það væri ódýrara auk þess sem betra væri að vera með fastráðið fólk. Um 90 hjúkrunarfræðinga vantar á spítalann.

Elsa B. Friðfinnsdóttir, formaður Félags hjúkrunarfræðinga, tekur undir með hjúkrunarforstjóranum að betra sé að spítalinn sé með fastráðið starfsfólk. Hún segir aðkeyptu þjónustuna hafa verið dýra en varar jafnframt við of mikilli fjölgun erlendra hjúkrunarfræðinga hér á landi.

„Það er mikilvægt að þeir hjúkrunarfræðingar sem hingað eru ráðnir fái nægan aðlögunartíma og góða kennslu í íslensku, annars getur það farið svo að álagið á þá sem fyrir eru aukist bara," segir Elsa. Hún segir nokkuð hafa verið um það að hjúkrunarfræðingar frá bæði Filippseyjum, Þýskalandi, Bretlandi og hinum norrænu ríkjunum hafi ráðið sig inn á spítalann. Þeim hafi gengið misjafnlega vel að aðlagast aðstæðum.

Aðspurð um hvernig staðið sé að íslenskukennslu fyrir erlenda hjúkrunarfræðinga segir Elsa að þau mál séu ekki í góðum farvegi. Eftir því sem hún viti best bjóði Endurmenntun HÍ ekki lengur upp á sérhæfð íslenskunámskeið og þá sé langur biðlisti eftir íslenskukennslu hjá Mími. Þar þurfi að taka til hendinni.

Hún bendir enn fremur á að auk íslenskukennslunnar þurfi ákveðna menningarbundnakennslu „því hjúkrunarfræðingar þurfa meðal annars að eiga samskipti við aðstandendur sjúklinga við andlát þeirra og það er erfitt fyrir þá sem ekki þekkja til menningar hér á landi," segir Elsa.