Leifarnar af Bjólfskviðu enn á Kerlingardalsheiði

Leikmyndin úr kvikmyndinni Bjólfskviðu er enn á Kerlingardalsheiði, rúmum þremur árum eftir að tökum á myndinni lauk. Bóndinn í Kerlingardal segir þetta til skammar fyrir alla þá sem að myndinni komu.

Bóndinn, Karl Pálmason, segir að töluvert af leikmyndinni sé enn uppistandandi, en verst sé þó ruslið sem þegar hefur fokið um allar jarðir. „Þetta er auðvitað hundljótt," segir Karl á Kerlingardal í samtali við Vísi. Hann segir að framleiðendur myndarinnar hafi skuldbundið sig til þess að fjarlægja leikmyndina að loknum tökum en að það hafi aldrei verið gert. „Þetta er fyrst og fremst til skammar alla sem standa að þessu," segir Karl.

Tökur á Bjólfskviðu fóru fram árið 2004 og var um að ræða dýrustu kvikmynd sem tekin hafði verið hér á landi. tökur gengu brösuglega og íslenska veðráttan fór illa með kvikmyndalið. Í fréttum Ríkisútvarpsins fyrir rúmum tveimur árum síðan kom fram að Heilbrigðiseftirlit Suðurlands væri að vinna í því að fá svæðið hreinsað. Sú hreinsun á enn eftir að fara fram að því er virðist.

Ekki náðist í framleiðendur Bjólfskviðu.