Sala á hlut í Hitaveitunni skoðuð ofan í kjölinn

Lúðvík Geirsson bæjarstjóri í Hafnarfirði segir að hugsanleg sala á hlut bæjarins í Hitaveitu Suðurnesja verði skoðuð ofan í kjölinn á næstunni. "Við stefnum að því að ljúka þessu máli eins fljótt og kostur er en ég á ekki von á neinni ákvörðun fyrr en eftir einhverjar vikur," segir Lúðvík.

Eins og kunnugt er af fréttum var boðað til aukafundar í bæjarráði Hafnarfjarðar um málið í síðustu viku. Lúðvík segir að það hafi verið vinnufundur. "Við höfum óskað eftir ákveðnum gögnum og fundurinn var haldinn til að ræða þau," segir Lúðvík. "Í framhaldinu höfum við óskað eftir frekari upplýsingum í málinu."

Hlutur Hafnarfjarðar í Hitaveitunni er metinn á 7-8 milljarða króna. Fari svo að Hafnarfjörður selji hlutinn á Orkuveita Reykjavíkur forkaupsrétt á honum. Lúðvík segir að bæjarstjórn sé að skoða fleiri möguleika en að selja hlutinn eins og t.d. að leggja hann inn sem eign einhversstaðar.