Á fimmta tug fatlaðra barna fá ekki fullt pláss á Vesturhlíð

Hátt í fimmtíu fötluð börn fá ekki fullt pláss á frístundaheimilinu Vesturhlíð vegna manneklu. Börnin fá vistun í mesta lagi þrjá daga í viku og þurfa foreldar þeirra að sleppa úr vinnu hina dagana. Foreldrar eru orðnir langþreyttir á ástandinu.

Á frístundaheimilinu Vesturhlíð eru rúmlega sextíu börn. Þau eru í Öskjuhlíðarskóla fyrir hádegi og dvelja í Vesturhlíð eftir hádegi. Nú vantar hátt í 20 manns til starfa svo hægt sé að veita öllum börnum fullt pláss.

Ragnheiður Sigmarsdóttir er móðir átta ára tvíburastúlkna og er önnur þeirra með downsheilkenni. Hún fær einungis vistun þrjá daga vikunnar og þarf Ragnheiður að taka sér frí frá vinnu eða hætta fyrr þá daga sem hún fær ekki gæslu.

Atli Lýðsson faðir 11 ára fatlaðrar stúlku segir ástandið aldrei hafa verið verra. Ástandið sé verst á vorin og haustin.

Lilja Rós Óskarsdóttir móðir 8 ára drengs með downsheilkenni segir þau hjónin skiptast á að taka sér frí frá vinnu þá daga sem þau fá ekki gæslu. Sem betur fer eigi þau skilningsríka vinnuveitendur.