Tekist á um mögulegar olíulindir

Íslendingar, Færeyingar, Bretar og Írar ætla í vikunni að freista þess að ná samkomulagi um skiptingu Hatton Rockall svæðisins. Um mikla hagsmuni er að tefla því talið er að þar geti verið gjöfular olíulindir.

Svæðið er djúpt suður af Íslandi og vestur af Írlandi og Bretlandi en landgrunn Íslands tengist því. Allar þjóðirnar hafa gert tilkall til afmarkaðra svæða á heildarsvæðinu og skarast kröfurnar meira og minna. Allar þjóðirnar hafa lýst áhuga á að ná samkomulagi sem hljóti alþjóða viðurkenningu.

En það hillir víðar undir olíuvinnslu á norðurslóðum. Sem kunnugt er lofar olíuleit suðvetur af Færeyjum góðu, rannsóknir á Jan Mayen hryggnum norðaustur af Íslandi til Jan Mayen gefa vísbendingar um olíu þar og tilefni til frekari leitar.

Og nú berast þær fréttir að rannsóknir bandarískra olíuleitarmanna bendi til þess að gríðarlega mikið af olíu og jarðgasi sé að finna við norðausturströnd Grænlands eða Íslandsmegin á Grænlandi. Er talið að verðmæti olíunnar nemi eitt hundrað þúsund milljörðum íslenskra króna og að svæðið sé nítjánda olíuauðugasta svæði í heimi. Þar geti vinnsla jafnvel hafist eftir tíu til fimmtán ár.

Loks er svo kapphlaup Rússa, Kanadamanna, Bandaríkjamanna og fleiri um hafsbotninn á Norðurpólnum knúið áfram af von um olíu-og gaslindir þar auk málma.