Eðlileg gagnrýni

Gagnrýni Ingibjargar Sólrúnar Gísladóttur, formanns Samfylkingarinnar, á hagstjórn síðustu ríkisstjórnar er eðlileg að mati Péturs H. Blöndal, alþingismanns. Hann segir ekkert óeðlilegt að flokkur sem kemur nýr inn í ríkisstjórn gagnrýni aðgerðir þeirrar sem sat á undan.

„Mér finnst eðlilegt að flokkar sem koma inn í nýja ríkisstjórn geri athugasemdir við aðgerðir fyrri ríkisstjórna," sagði Pétur H. Blöndal, alþingismaður í samtali við Vísi. „Hins vegar voru útgjöldin í aðdraganda kosninga ekki meiri en venja er að mínu mati."

Ingibjörg Sólrún Gísladóttir, formaður Samfylkingarinnar, gagnrýndi hagstjórn síðustu ríkisstjórnar í ræðu við upphaf flokkstjórnarfundar á Selfossi á laugardaginn. Sagði hún fjáraustur úr ríkissjóði í aðdragana kosninga hafa sett nýrri ríkisstjórn miklar skorður við gerð fjárlaga fyrir næsta ár.

Pétur bendir á að afkoma ríkissjóðs hafi verið góð undanfarin ár og segir skuldbindingar síðustu ríkisstjórnar í aðdraganda kosninga ekki hafa farið úr böndunum.