Segir baráttu fyrir sameign á náttúruauðlindum tvísýna

Ingibjörg Sólrún Gísladóttir, formaður Samfylkingarinnar, sagði á fundi flokkstjórnar Samfylkingarinnar á Selfossi í dag að stjórnlaust kapphlaup um náttúruauðlindir, sem með réttu væru þjóðarinnar allrar, kallaði á tvísýna varnarbaráttu þeirra sem vildu tryggja skilgreinda sameign þjóðarinnar á sínum auðlindum.

Þetta væri afleiðing þess að stjórnvöld hefðu á liðnum árum afsalað sér mikilvægum stjórntækjum til að hafa áhrif á afdrifaríkar ákvarðanir um nýtingu náttúrusvæða í þágu stóriðju. Í máli hennar kom fram að í iðnaðarráðuneytinu væri í undirbúningi lagabreytingar sem miði að því að jarðhitaréttindi og vatnsréttindi, sem nú eru í opinberri eigu, verði það áfram.

Hún sagði að í nýrri löggjöf væri mikilvægt að búa svo um hnútana að auðlindirnar sjálfar verði skilgreindar sem sameign þjóðarinnar og að flutningskerfi orku, svo og rafveitur, hitaveitur, vatnsveitur og fráveitur, verði í félagslegri meirihlutaeign. Mikilvægt væri að þjóðin nyti arðsins af auðlindum sínum og hún missi þær ekki úr höndum sér.