Norrænir fjölmiðlar fjalla um fíkniefnamálið

Öll helstu dagblöðin í Danmörku fjölluðu um stóra fíkniefnamálið á síðum sínum í gærdag. Auk þess var VG í Noregi og norska ríkisútvarpið með fréttir af málinu. Nær allur fréttaflutningurinn byggir á skeyti frá Ritzau-fréttastofunni.

Stærsta dagblað Danmerkur, Jyllands Posten, greinir meðal annars frá því að lítilsháttar magn af fíkniefnum hafi fundist í fórum þeirra tveggja Íslendinga sem handteknir voru þar í landi. Og bætir því við að handtökurnar hafi verið framkvæmdar á Kaupmannahafnarsvæðinu.

Hvað varðar Íslendinginn sem handtekinn var í Noregi segir á vefsíðu VG að ekki hafi fengist uppgefið hvar í landinu það gerðist og að vakstjórinn í fíkniefnalögreglunni norsku hafi ekki viljað tjá sig um málið í gærkvöldi.

Norska ríkisútvarpið vitnar í Stefán Eiríksson lögreglustjóra höfuðborgarsvæðisins sem segir meðal annars að samvinnan við önnur lönd í gegnum Europol hafi verið afgerandi þáttur við uppljóstrun málsins.