Gríðarlegt vatnstjón í Glerárhverfi

Mikið vatnstjón varð í Glerárhverfi á Akureyri í dag. Um tíuleitið í morgun kom óvænt þrýstibylgja komið inn á heitavatnskerfið með þeim afleiðingum að kranar og öryggislokar sprungu.

Lögregla á Akureyri hefur farið í útköll í tvær íbúðir í dag vegna málsins. Önnur þeirra, á efri hæð í raðhúsi, var gríðarlega mikið skemmd. Að sögn lögreglu voru allar innréttingar og gólfefni mjög illa farin og lak vatn gegnum gólfplötu íbúðarinnar niður á neðri hæð.

Franz Árnason forstjóri Norðurorku sagði í samtali við Vísi að ekki væri vitað hvað olli þrýstibylgjunni, en verið sé að vinna í kerfinu á þessum slóðum. Hann segir að fyrirtækinu þyki það mjög leiðinlegt að það verði tjón hjá fólki. Vitað sé um skemmdir á 6-7 húsum, en skemmdirnar nái til nokkurra gatna í Glerárhverfi. Líklegt sé að tilkynningum fjölgi þegar fólk snýr heim frá vinnu.