Rússar enn á ferð við Íslandsstrendur

Langdrægar rússneskar sprengiflugvélar af gerðinni Tupolev 95 flugu inn á íslenska loftrýmiseftirlitssvæðið norður af landinu klukkan hálf sex í morgun. Í tilkynningu frá utanríkisráðuneytinu flugu vélarnar í hringferð um landið og komu næst landinu u.þ.b. 43 sjómílur suður af Kötlutanga.

 

Utanríkisráðuneytinu bárust upplýsingar í gærkvöldi um að slíkt flug gæti verið væntanlegt og var Ratsjárstofnun, sem fyrr, á vakt vegna þessa. „Fylgst var með fluginu allan tímann af Ratsjárstofnun og upplýsingum miðlað til viðeigandi stofnana innanlands, m.a. til þess að tryggja öryggi almennrar flugumferðar," segir í tilkynningunni.

 

Þá segir einnig að skipst hafi verið á upplýsingum við viðeigandi herstjórnir innan Atlantshafsbandalagsins og voru viðbrögð við fluginu samhæfð á milli þriggja bandalagsríkja, Íslands, Noregs og Bretlands.

 

Breskar orrustuþotur mættu sprengjuflugvélunum austur af landinu og fylgdu þeim norður eftir að mörkum loftrýmiseftirlitssvæðisins. Vélarnar rufu ekki lofthelgi Íslands.Þetta mun vera í þriðja sinn á stuttum tíma sem rússneskar herflugvélar koma inn á íslenska loftrýmiseftirlitssvæðið.