Meðalaldur ríkisstarfsmanna hækkar

Meðalaldur ríkisstarfsmanna er 45,4 ár og hefur hækkað um rúm fjögur ár frá árinu 1995. Þetta kemur fram í vefriti fjármálaráðuneytisins.

Þar er vísað í niðurstöður könnunar á starfsumhverfi ríkisstarfsmanna í fyrra en hún leiðir meðal annars í ljós að meðalaldur kvenna í störfum hjá ríkinu sé 45 ár en 46 hjá körlum. Yngstur er starfsmannahópurinn hjá stofnunum félags- og lýðheilsumála en þar er meðalaldurinn 40,5 ár. Hæstur er meðalaldurinn hjá stofnunum atvinnumála, ráðuneyta, umhverfis-, skipulags- og samgöngumála en þar er hann 48,2 ár. Þá leiðir könnunin í ljós að meðalaldur ríkisstarfsmanna árið 1995 hafi verið 41 ár, 40 ár hjá konum og 42 ár hjá körlum.

Enn fremur kemur fram að 57 prósent ríkisstarfsmanna eru með háskólamenntun en fyrir níu árum voru 43 prósent háskólagengin. Að sama skapi hefur hlutfall starfsmanna með starfs- og framhaldsmenntun lækkað, er nú rúmur þriðjungur en var tæp 45 prósent árið 1998. Hlutfall þeirra sem eru einvörðungu með grunnmenntun hefur einnig lækkað, úr 12 prósentum í innan við 9 prósent.

Alls voru 82 prósent starfsmanna framhalds- og háskóla með háskólapróf en 20 prósent starfsmanna sýslumanns- og lögregluembætta og fangelsa. Í þeim flokki eru flestir með starfs- og framhaldsmenntun.