Fordæma lokun mjólkurstöðvarinnar á Egilsstöðum

Lokun mjólkurstöðvarinnar á Egilsstöðum er enn ein aðför að hefðbundinni búsetu og atvinnulífi dreifbýlisins. Þetta kemur fram í yfirlýsingu frá AFL starfgreinafélagi. Félagið fordæmir lokunina og skorar á Mjólkurbú Flóamanna að endurskoða ákvörðunina.

Í yfirlýsingunni kemur fram að þrátt fyrir að lokunin sé sögð vera gerð í nafni hagræðingar liggi ekki fyrir í hverju sú hagræðing sé fólgin. Svo virðist sem fyrst hafi verið ákveðið að loka og svo reiknuð hagræðing inn í ákvörðunina að mati starfsgreinafélagsins.

Ennfremur segir í yfirlýsingunni að reynslan hafi sýnt að þar sem mjólkurbúum sé lokað fylgir fljótlega minnkandi framleiðsla. Þannig hafi þessi ákvörðun í för með sér fyrirsjáanlega stórfellda byggðaröskun á Austurlandi.

Félagið skorar á Mjólkurbú Flóamanna að endurskoða ákvörðun sína og krefst þess að áður en ákvörðunin sé tekin verði lagður fram grundaður rökstuðningur fyrir því að ráðast að byggðinni og lífskjörum fólks.