Leita að manni sem féll í Sogið

Björgunarsveitir Slysavarnafélagsins Landsbjargar á Suðurlandi leita nú manns er féll í Sogið, við Bildsfell rétt eftir klukkan 17:00 í dag. Ekkert hefur sést til mannsins síðan hann fór í ánna. Þyrla Landhelgisgæslunnar hefur verið kölluð út.

Annar maður fór út í ánna á eftir þeim sem nú er leitað en óstaðfestar heimildir herma að honum hafi verið bjargað um borð í bát sem var skammt frá.

Mennirnir tveir voru við veiðar í Soginu.

Nú eru 12 bátar frá björgunarsveitum Slysavarnafélagsins Landsbjargar við leitina sem og gönguhópar sem leita bakka árinnar. Einnig er búið að kalla út kafara og hunda.