Tveir dæmdir fyrir fíkniefnalagabrot á Sauðárkróki

Kona á fimmtugsaldri var í Héraðsdómi Norðurlands vestra í dag dæmd í 30 daga skilorðsbundið fangelsi fyrir fíkniefnalagabrot. Við húsleit á heimili konunnar í síðastliðnum aprílmánuði fann lögreglan kannabisefni, hass og amfetamín. Þá var tæplega tvítugur karlmaður einnig fundinn sekur fyrir brot á fíkniefnalögum.

Fram kemur í dómsorði að við húsleit á heimili konunnar hafi lögreglan fundið 3,25 grömm af tóbaksblönduðu kannabisefni, 67,16 grömm af hassi og 0,59 grömm af amfetamíni. Konan hefur áður komist í kast við lögin og á að baki allnokkurn sakarferil sem nær aftur til ársins 1985. Hún játaði brot sitt fyrir dómi.

Þá var tæplega tvítugur karlmaður dæmdur til að greiða 25 þúsund krónur í sekt fyrir vörslu ólöglegra fíkniefna. Lögreglan fann efnin í bifreið mannsins en um var að ræða 0,17 grömm af tóbaksblönduðu kannabisefni. Maðurinn játaði brot sitt fyrir dómi.