Vill að Lögmannafélagið taki upp mál Kompáslögmanns

Atli Gíslason, alþingismaður og lögmaður segir að næg næg úrræði séu fyrir hendi hjá Lögmannafélagi Íslands til að grípa inn í mál lögfræðings sem ákærður hefur verið fyrir kynferðisbrot. Í Kompás í gær kom fram að maðurinn sé verjandi annara meintra kynferðisbrotamanna þrátt fyrir að mál hans sjálfs sé í vinnslu.

Atli segist telja eðlilegt að lögmannafélagið grípi inn í málið af sjálfsdáðum, ekki þurfi kæra að koma til.

Atli vitnar í 2. grein í siðareglum lögmanna þar sem segir að Lögmaður skuli gæta heiðurs lögmannastéttarinnar, jafnt í lögmannsstörfum sínum sem öðrum athöfnum. Atli bendir þó á að mál lögmannsins sé enn í dómsmeðferð og að hann sé saklaus þar til sekt hans sé sönnuð.

Hins vegar sé um svo alvarlegar ásakanir að ræða að Atli segist vera þeirrar skoðunar að lögmannafélagið eigi að taka málið upp af sjálfsdáðum. Samkvæmt 14. grein lögmannalaga getur úrskurðarnefnd lögmanna lagt það til við dómsmálaráðherra að réttindi lögmanns verði felld niður tímabundið, eða hann sviptur réttindum séu sakir miklar.

„Það eru því klárlega úrræði í þessu máli," segir Atli sem segist vera þeirrar skoðunnar að tímabundin svipting á lögmannsréttindum mannsins sé í spilunum, eins og hann orðar það. „Þessi lögfræðingur ætti reyndar sjálfur að leggja inn réttindi sín á meðan þetta mál er fyrir dómstólum, það er mín skoðun, en ég ítreka að maðurinn er saklaus uns sekt hans er sönnuð.