Lífetanólstöðin ekki opin almenningi strax

Lífetanólstöðin sem opnuð var fyrir tveimur dögum verður ekki opin almenningi fyrr en eftir nokkrar vikur. Forstjóri Brimborgar segir að um tilraunaverkefni sé að ræða og eftir eigi að að kanna, tollafyrirkomulag á tvíorkubílum og etanóli, áhuga almennings og ekki síður áhuga olíufélaganna.

Brimborg stóð fyrir opnun fyrstu E85 lífetanólstöðvarinnar síðastliðinn mánudag á bensínstöðinni í Álfheimum. Brimborg keypti 2000 lítra af etanóli og flutti inn tvo tvíorkubíla samhliða því án. Etanólið ætti að duga bílunum tveimur í hálft ár. Egill Jóhannsson forstjóri Brimborgar segir stöðina ekki opna fyrir almenningi fyrst um sinn þar sem um tilraunaverkefni sé að ræða. Verið sé að kanna ýmislegt sem tengist notkun etanólsins.

Egill segir að markmiðið með opnun stöðvarinnar sé fyrst og fremst að sýna fram á að þetta sé mögulegt. Almenningur og stjórnvöld hafi sýnt þessu það mikinn áhuga fyrstu dagana að nær einsýnt þyki að þetta verði að veruleika. Ekki er vitað hversu margir bílar hér á landi gangi fyrir bæði bensíni og etanóli en þeir gætu verið einhverjir tugir. Nú sé verið að kanna tollafyrirkomulag á tvíorkubílum og etanóli til framtíðar.