25.000 fm miðborgarkjarni í bígerð

Á morgunverðarfundi í morgun um fyrirhugaðann miðborgarkjarna á Barónsreit kom fram að gert er ráð fyrir um 25.000 fermetra rými undir verslanir og þjónustu þar sem m.a. verður stór matvöruverslun, alþjóðlegar verslanir með þekktum vörumerkjum, kvikmyndahús og veitingastaðir. Þá er gert ráð fyrir bílakjallara á fjórum hæðum.

Yfirskrift morgunverðarfundarins sem Samson Properties efndi til í Listasafni Íslands var „Lifandi miðborg". Þar voru ræddar áherslur og leiðir við endurnýjun og uppbyggingu miðborgar Reykjavíkur.

Í máli Sveins Björnssonar, framkvæmdastjóra Samson Properties, kom fram að félagið vill taka virkan þátt í að efla og treysta miðborgina. Sá vilji væri í takt við stefnumörkun Reykjavíkurborgar þar sem fram kemur að efling miðborgarinnar er lykilatriði þegar styrkja á og þróa Reykjavík sem alþjóðlega höfuðborg.

„Kannanir sýna að fólk í úthverfum kemur mjög sjaldan í miðborgina til að sækja verslun og þjónustu", segir Sveinn. "Við bætist að uppbygging atvinnu- og íbúðarsvæða næstu árin verður að mestu í úthverfum og nágrannasveitarfélögum sem þýðir að samkeppnishæfni miðborgarinnar mun veikjast. Því er ekki nema eðlilegt að þeir sem annt er um miðborgina vilji bregðast við."

Svæði nýs miðborgarkjarna afmarkast af Laugavegi, Vitastíg, Skúlagötu og Barónsstíg