Vilja hætta við smíði Grímseyjarferju

Vaxandi stuðningur er innan samgöngunefndar alþingis við að smíði fyrirhugaðrar Grímseyjarferju verði hætt. Grímseyingar segja skipið ekki henta vegna veðurs og ónógrar burðargetu.

Grímseyingum þótti fengur í því að samgöngunefnd Alþingis skyldi heimsækja eyjarskeggja í dag og var varla um annað rætt en Grímseyjarferjuna. Hreppsnefndarmenn komu sínum sjónarmiðum að og að loknum fundi lýstu þrír nefndarmenn samgöngunefndar því yfir í samtölum við Stöð 2 að þeir teldu heppilegast að hætta strax þeirri raunasögu sem smíði ferjunnar hefur verið og finna nýtt skip til vöru- og farþegaflutninga.

Sjálfstæðismenn eru klofnir í afstöðu sinni. Bæði Ármann Ólafsson og Ólöf Nordal vilja klára verkið líkt og Steinunn Valdís Óskarsdóttir, formaður samgöngunefndar, en Árni Johnsen vill hætta við eins og fleiri.

Kristján Möller samgönguráðherra vill ekki tjá sig um hvort rétt sé að hætta við smíði ferjunnar nú.