Lögreglan varar við svikapóstum

Ríkislögreglustjóri hefur gefið út viðvörun vegna tölvupósta frá svikahröppum sem innihalda morðhótanir. Í póstunum er fólki hótað lífláti greiði það ekki háa upphæð inn á bankareikning erlendis. Nokkuð hefur borið á því að Íslendingar hafi fengið slíkar hótanir í gegnum tölvupóst að sögn lögreglu. Fólk er hvatt til að svara ekki þessum bréfum.

Samkvæmt tilkynningu frá ríkislögreglustjóra er um að ræða nýja tegund ruslpósts sem kallast á ensku "hit man scam" eða "killer spam". Þessi tegund tölvupósts er kenndur við grein 419 sem er ákvæði í nígerískum hegningarlögum er varðar fjársvik.

Alríkislögreglan í Bandaríkjunum, FBI, og New Scotland Yard í Bretlandi hafa fengið margar kvartanir frá fólki vegna þessara sendinga. Samkvæmt yfirmanni kvörtunarmiðstöðvar internetsins hjá FBI er þessum póstum ekki beint gegn fyrirfram ákveðnum aðilum og er ekki vitað til þess að fólk hafi tapað peningum á þessu eða að einhverjum hafi verið unnið mein.

Í tölvupóstinum kemur fram að greiði viðtakandi tiltekna upphæð inn á bankareikninga erlendis þá verði lífi viðkomandi þyrmt. Svikahrapparnir beita ýmsum brögðum og er nýleg aðferð þeirra að senda tölvupóst í nafni erlendra lögreglustofnana eins og FBI. Þar kemur fram að nafn viðtakenda hafi fundist í fórum handtekins leigumorðingja sem myrt hafi einstaklinga í Bandaríkjunum og Bretlandi sem hafi skorast undan að borga féð sem krafist var fyrir að þyrma lífi þeirra. Er viðtakandi beðinn um að svara tölvupóstinum til að hjálpa við frekari rannsókn málsins.

Svikahrapparnir velja netföng af handahófi og eins og öðrum "Nígeríubréfum" á alls ekki að svara þessum. Ef slíkum pósti er svarað halda hótanirnar áfram. Almenningi er bent á að leita til lögreglu ef þeim berst sambærilegur póstur og lýst er hér að framan.