Nágrannar ósáttir við flutning hússins að Bergstaðastræti

Verslunareigendur og íbúar við Klapparstíg eru ósáttir við það hversu illa flutningur hússins frá Hverfisgötu að Bergstaðastræti var undirbúinn. Ari Magnússon, eigandi verslunarinnar Antíkmunir, telur að fólk í nágrenninu hefði átt að vera aðvarað.

Skilti voru rifin af húsinu við Klapparstíg númer 40, þar sem verslun hans er. Hann var ekki látinn vita af því að skiltin yrðu rifin af. Honum var heldur ekki boðið að þau yrðu sett upp aftur. Þegar hann hafði samband við Reykjavíkurborg vegna málsins varð fátt um svör. „Við munum skoða málið," voru svör borgarstarfsmanna.. Ari telur að fyrst hægt var að rífa niður skiltin án þess að tala við hann þá hefði líka verið hægt að setja þau upp.

Arnar Hannes Gestsson er eigandi hússins við Laugarveg 20b. Skemmdir urðu á fimm til sex stöðum á húsinu að hans sögn. „Það er þröngt þarna og svona lagað bara gerist," segir Arnar. Hann segir að lögreglan hafi tekið skýrslu af skemmdunum í morgun, að sér viðstöddum. En hann veit ekki hver mun greiða fyrir þær. „Ef að við þurfum að borga skemmdirnar þá bara borgum við þær. Ef að verktakinn eða tryggingarnar borga þá er það bara seinni tíma mál," segir Arnar. Arnar segist þekkja Sigurjón Halldórsson, eiganda SR verktaka, af góðu einu og hann hafi alltaf staðið sína pligt.

Byrjað var að flytja húsið frá Hverfisgötu 44 að Bergstaðastræti í gærkvöld. Erfiðlega gekk að flytja húsið. Fyrst var löng töf neðarlega við Klapparstíg fyrir utan skemmtistaðinn Sirkus, en þegar þeir komust svo loks yfir Laugaveginn, festist húsið aftur ofar á Klapparstígnum. Flutningunum lauk svo fyrir hádegi í dag. Upphaflega var gert ráð fyrir að flutningarnir tækju tvo klukkutíma.