Aðgerðarleysi tefur byggingu

Allt bendir til þess að framkvæmdir vegna byggingu hjúkrunarheimilis við Eiðisgranda tefjist um eitt til tvö ár vegna aðgerðarleysis heilbrigðisráðuneytisins. Bæjarstjóri Seltjarnarness segir brýnt að framkvæmdirnar hefjist sem fyrst. Hann sendi heilbrigðismálaráðherra bréf fyrir þremur vikum þar sem óskað var eftir afstöðu hans til málsins. Ekkert svar hefur borist.

„Framkvæmdirnar eru að tefjast um eitt til tvö ár miðað við núverandi gang málsins," sagði Jónmundur Guðmundsson, bæjarstjóri Seltjarnarness, í samtali við Vísi. „Það eru alvarleg tíðindi enda þörfin á hjúkrunarrými brýn."

Í maímánuði í fyrra undirrituðu Reykjavíkurborg, Seltjarnarnesbær og heilbrigðis- og tryggingamálaráðuneytið þríhliða samkomulag um byggingu hjúkrunarheimilis á Lýsislóðinni við Eiðisgranda. Samkvæmt samkomulaginu lagði Seltjarnarnesbær til lóðina og 10 prósent af heildarkostnaði framkvæmdanna. Ráðuneytið greiddi 70 prósent og Reykjavíkurborg 20 prósent. Áttu framkvæmdirnar að hefjast á næsta ári.

Um er að ræða hjúkrunarrými fyrir 90 einstaklinga.

Ekkert hefur hins vegar heyrst frá heilbrigðisráðuneytinu vegna málsins síðan samkomulagið var gert. Óttast Jónmundur að stefnubreyting hafi átt sér stað hjá ráðuneytinu án þess að það hafi verið tilkynnt formlega. Hann sendi því heilbrigðisráðherra bréf þann 24. ágúst síðastliðinn þar sem óskað var eftir skýringum á töfum, afstöðu ráðherra til samkomulagsins og framvindu framkvæmdanna. „Af svörum embættismanna í fjölmiðlum virðist ráðuneytið ætla að efna samkomulagið en við bíðum hins vegar enn eftir svari við fyrirspurn okkar," sagði Jónmundur.