Slagsmál unglinga mynduð og sett á Netið

Slagsmál á meðal reykvískra unglinga voru tekin upp á myndband og sett á Netið. Samkvæmt heimildum Vísis eru unglingarnir á aldrinum 14-15 ára og nemendur í Réttarholtsskóla. Aðalbjörg Traustadóttir, framkvæmdastjóri hjá Þjónustumiðstöð Laugardals og Háaleitis, hafði ekki séð myndbandið þegar blaðamaður Vísis benti henni á það.

Aðalbjörg segir að sér finnist ofbeldið á myndbandinu vera ofboðslega ljótt. „Þetta er eitthvað sem við viljum ekki sjá og við viljum ekki að börnin okkar standi fyrir," sagði Aðalbjörg við Vísi. Hún segir að málið verði skoðað. Ef í ljós komi að ofbeldið sé ekki sviðsett verði haft samband við viðeigandi aðila.

Aðalbjörg telur að mismunandi aðilar þurfi að taka á málum sem þessum. Það fari eftir aðstæðum hverju sinni. „Skólastjórnendur Réttarholtsskóla munu væntanlega vilja fá vitneskju um málið ef drengirnir á myndbandinu eru nemendur í skólanum, og barnaverndaryfirvöld," segir Aðalbjörg. Þá geti verið að gera þurfi lögreglunni viðvart um málið. „Ég get líka ímyndað mér að málið snerti friðhelgi einkalífsins því varla hafa allir á myndbandinu viljað að það yrði tekin mynd af þeim," segir Aðalbjörg.

Aðalbjörg kannast ekki við að mál eins og þetta hafi komið upp í Laugardals- og Háaleitishverfis fyrr, en skemmst sé að minnast þess þegar slagsmál við Háskólabíó voru tekin upp.

Ekki náðist í skólastjóra Réttarholtsskóla vegna málsins. Formaður foreldrafélags skólans vildi ekkert láta hafa eftir sér um málið.