Rangar fullyrðingar um lyfjaverð á Íslandi

Allar fullyrðingar um að lyfjaverð á Íslandi sé hærra en í nágrannalöndum okkar eru úr lausu lofti gripnar. Þetta kemur fram í yfirlýsingu frá Samtökum framleiðenda frumlyfja. Þau benda á að frumlyf á íslenskum markaði séu ódýrari en í Danmörku. Samtökin vilja að stjórnvöld felli niður eða lækki virðisaukaskatt á lyfjum.

„Það er oft fullyrt í fjölmiðlum að lyfjaverð á Íslandi sé 60 prósent hærra en á meginlandi Evrópu," sagði Jakob Falur Garðarsson, framkvæmdastjóri Samtaka framleiðenda frumlyfja, í samtali við Vísi. „Þær fullyrðingar eru hins vegar rangar og úr lausu lofti gripnar."

Í yfirlýsingu sem Frumtök - Samtök framleiðenda frumlyfja sendu frá sér kemur fram að heildsöluverð frumlyfja hér á landi sé að meðaltali hið sama og í þeim samanburðarlöndum sem hið opinbera hefur til viðmiðunar. Bent er á að hlutfall lyfja af opinberum heilbrigðisútgjöldum hafi lækkað jafnt og þétt undanfarin ár, úr 9,13 prósent árið 2000 í 7,65 prósent árið 2005.

Þá segir ennfremur í yfirlýsingunni að vandamálin í heilbrigðiskerfinu séu stór og erfið viðureignar en lúti síst að verði lyfja. Menn hafi hins vegar kosið að stinga höfðinu í sandinn gagnvart öðrum vandamálum og einblínt eingöngu á lyfjaverð. Samtökin benda á að sennilega mætti draga úr lyfjanotkun í landinu með því að stytta biðlista eftir aðgerðum á spítölum. Hér hafi hins vegar lyf orðið fyrir valinu sem ódýrasti valkosturinn.

Þá gagnrýna samtökin skattastefnu stjórnvalda gagnvart lyfjum. Benda þau á að hér á landi sé lagður 24,5 prósent virðisaukaskattur á lyf en á sama tíma sé aðeins 7 prósent skattur á gosdrykki. Í Svíþjóð er enginn virðisaukaskattur lagður á lyf.

„Stjórnarflokkarnir tveir lofuðu fyrir kosningar að lækka eða fella alveg niður virðisaukaskatt á lyfjum. Nú bíðum við bara eftir því að þeir efni þetta loforð," sagði Jakob Falur.