Nauðgari átti að vera í farbanni

Brynjar Níelsson hæstaréttarlögmaður segir að varla sé hægt að benda á nokkurn einn aðila sem beri ábyrgð á því þegar dæmdir menn strjúki burt úr landi eftir að hafa hlotið fangelsisrefsingu. Hann segir að farbannsúrskurðir þurfi að lúta ákveðnum skilyrðum sem kveðið sé á um í lögum. Farbann sé mikil refsing. „Það er í raun mjög mikil refsing að vera dæmdur í farbann. Menn eiga kannski fjölskyldu og eitthvað til að hverfa að erlendis en þurfa svo bara að vera kyrrsettir á Rauðakrosshóteli hér," segir Brynjar. Mjög bagalegt sé ef saklausir menn fái slíkan úrskurð.

DV greindi frá því í morgun að Portúgalinn Americo Luis Da Silva Concalves væri farinn burt frá Íslandi. Síðastliðinn fimmtudag var Concalves dæmdur í þriggja og hálfs árs fangelsi fyrir hrottalega nauðgun.

Brynjar segir að eðlilegt hefði verið að dæma Portúgalann í farbann. Hann hefði þegar verið dæmdur fyrir nauðgunarbrotið í héraði. Þá hefðu áverkar á konunni bent til sektar hans. Brynjar segir að erfitt geti reynst að finna manninn. Hins vegar verði að hafa í huga að maðurinn þurfi alltaf að vera á flótta ef hann gefur sig ekki fram. „Það er í raun mjög mikil refsing fyrir sig. Ekki er víst að það sé eitthvað skárra en að sitja inni á Litla-Hrauni," segir Brynjar.