Sjö handteknir vegna tilræðis í Tyrklandi

Lögreglan í Tyrklandi handtók í dag sjö manns sem hún grunar um að hafa lagt á ráðin um sprengjuárás í höfuðborginni Ankara í síðustu viku. Lögreglu tókst að koma í veg fyrir árásina á þriðjudaginn var þegar hún fann bíl fullan af sprengiefni í stóru bílastæðahúsi.

Lögregla segir að fleiri hafi verið viðriðnir tilræðið og leitar hún þeirra nú. Yfirvöld segja að mennirnir sjö tengist Verkalýðsflokki Kúrdistans, PKK, hópi sem berst fyrir sjálfstæði Kúrdistans frá Tyrklandi og er á lista Evrópusambandsins og Bandaríkjanna yfir hryðjuverkasamtök. Talsmenn PKK neita allri aðild að málinu.