Vistun fanga á Sólheimum gefur góða raun

Það hefur gefið góða raun að vista fanga á Sólheimum í Grímsnesi en þar hafa fyrirmyndarfangar afplánað hluta af fangavist sinni. Færst hefur í vöxt að önnur úrræði en fangelsun sé notuð við betrun fanga á Íslandi.

Þrjú ár eru liðin frá því tilraunir hófust með vistun fanga á Sólheimum í Grímsnesi. Að sögn Birgis Thomsen, prests á Sólheimum, er reynslan góð af þessari tilraun.

Nærri tíu fangar hafa verið vistaðir á Sólheimum frá því tilraunir hófust en þeir afplána þar jafnan síðasta hlutann af refsivist sinni. Mikil áhersla er lögð á að fjölskylda fanganna dvelji hjá þeim eins og kostur er.

Ströng skilyrði eru sett fyrir vistun fanga á Sólheimum. Áhersla er lögð á að fanginn hafi ekki neytt ávanabindandi eða örvandi lyfja eða gerst sekur um agabrot í refsivistinni.

Mjög hefur færst í vöxt að fangelsisyfirvöld beiti öðrum úrræðum en fangelsun við betrun fanga. Á þessu ári hafa yfir sjötíu fangar verið vistaðir á meðferðarstofnun eða áfangaheimili síðustu mánuði refsivistar sinnar.