Tuttugu og fjórir teknir fyrir brot á lögreglusamþykkt

Tuttugu og fjórir voru handteknir í miðbæ Reykjavíkur í nótt fyrir brot á lögreglusamþykkt, en eins og kunnugt er hefur lögregla tekið harðar á slíkum brotum síðustu tvær helgar þar sem eftirlit hefur verið hert. Alls hafa því 38 verið teknir fyrir slík brot um helgina.

Um er að ræða svokölluð hátternisbrot og voru flestir handteknir fyrir að sinna kalli náttúrunnar á götum úti í miðbænum. Helmingur þeirra sem teknir voru í nótt gekkst við brotum sínum en eftir á að ræða við hinn helminginn um framhaldið. Tíu þúsund króna sekt liggur við brotum á lögreglusamþykkt gangist menn strax við brotinu.

Lögregla segist finna bragarmun á ástandinu í miðbænum eftir að fjölgað var í hópi lögreglumanna þar um helgar en af nógu sé að taka við að siða borgarann til. Fólk verði að átta sig á því að það borgi sig ekki að vera öfurölvi í miðbænum.

Mikill mannfjöldi var í bænum að sögn lögreglu og töluverður erill en engin stórmál komu upp.