Hellisheiðin opnuð á ný

Búið er að opna Hellisheiðina á ný en henni var lokað um sjöleytið í kvöld eftir að tveir fólksbílar rákust saman í Kömbunum. Að sögn lögreglunnar á Selfossi komu bílarnir tveir úr gagnstæðri átt og var áreksturinn allharður.

Ökumaður annars bílsins var fluttur á sjúkrahús í Reykjavík en hann mun ekki hafa verið lífshættulega slasaður. Báðir bílarnir eru hins vegar taldir ónýtir. Hellisheiðinni var lokað í um einn og hálfan tíma vegna slyssins og var umferð beint um Þrengslin á meðan.

Nokkur hálka og krapi hefur verið á heiðinni í dag og jörð alhvít utan vegar. Lögregla beinir því til vegfarenda að fara varlega í hálkunni.