Hellisheiðin lokuð vegna umferðarslyss

Hellisheiðin er lokuð vegna bílslyss sem þar varð upp úr klukkan sjö. Þá rákust tveir bílar saman í Kömbunum og þurfti að flytja einn með sjúkrabíl á slysadeild Landspítalans í Fossvogi.

Ekki liggur fyrir hvort hann var alvarlega slasaður og þá liggja tildrög slyssins ekki fyrir. Lögreglan á Selfossi bendir fólki á að fara Þrengslin á meðan unnið er á vettvangi slyssins en ekki liggur fyrir hvenær Hellisheiðin verður opnuð aftur.

Nokkur hálka og krapi hefur verið á heiðinni í dag og jörð alhvít utan vegar. Lögregla beinir því til vegfarenda að fara varlega í hálkunni.