Verkalýðsforkólfar í hár saman út af fiskvinnslu

Verkalýðsforkólfar á Akureyri eru komnir í hár saman vegna ítrekaðra spádóma annars þeirra um að fiskvinnsla sé að hverfa burt úr bænum.

Þeir eru báðir með skrifstofur undir sama þaki í verkalýðshúsinu á Akureyri, þeir Konráð Alfreðsson, formaður Sjómannafélags Eyjafjarðar, og Björn Snæbjörnsson, formaður Einingar-Iðju. En þeir eru ekki alltaf sammála.

Konráð Alfreðsson hélt því fram í fréttum Stöðvar 2 á dögunum að Guðmundur Kristjánsson, forstjóri Brims, ætlaði sér burt úr bænum með landvinnslu á fiski. Hann hefur sagt þetta áður og gerir talsmaður verkafólks sem starfar í landvinnslu Brims alvarlegar athugasemdir við þennan málflutning.

Fyrir liggur að allur kvóti Brims hefur flust frá Akureyri en það þýðir ekki að mati Einingar-Iðju að landvinnslan hverfi burt.

Guðmundur Kristjánsson, forstjóri Brims, segir sjálfur að ekkert sé hæft í því að hann sé að flytja landvinnsluna burt úr bænum.