Starfshópur ráðherra ákveður samningsmarkið í loftlagsmálum

Þórunn Sveinbjarnardóttir umhverfisráðherra stýrir sérstökum starfshópi ráðherra sem ætlað er að móta samningsmarkmið Íslands í væntanlegum viðræðum um samkomulag í loftslagsmálum eftir 2012. Auk Þórunnar verða þeir Össur Skarphéðinsson iðnaðarráðherra, Árni M. Mathiesen fjármálaráðherra og Guðlaugur Þór Þórðarson heilbrigðisráðherra í starfshópnum.

Eins og kunnugt er rennur fyrsta skuldbindingartímabil Kyoto-bókunarinnar úr árið 2012 og því undirbúa þjóðir heims nú viðræður um áframhaldandi aðgerðir í loftlagsmálum heimsins.

Fram kemur á vef umhverfisráðuneytisins að áhersla sé lögð á að nýtt samkomulag náist, ekki síst vegna nýrrar úttektar Vísindanefndar Sameinuðu þjóðanna um loftslagsbreytingar sem segir að loftslagsbreytingar af mannavöldum eigi sér nú þegar greinilega stað og að hlýnun lofthjúpsins muni halda áfram samfara vaxandi losun gróðurhúsalofttegunda. Loftslagsbreytingar muni hafa afdrifaríkar afleiðingar fyrir heimsbyggðina á komandi áratugum verði ekki reynt að draga úr losun.

Aðildarþjóðir Loftlagssamnings Sameinuðu þjóðanna funda á Balí í desember og þar er vonast til að fáist umboð til víðtækra samningaviðræðna um framtíð loftslagsmála eftir 2012 með þátttöku allra ríkja, þ.á m. Bandaríkjanna og Ástralíu, sem ekki eru aðilar að Kyoto-bókuninni og þróunarríkjanna sem ekki hafa tölulegar skuldbindingar samkvæmt Kyoto.