Lögreglan hljóp uppi ölvaðan hjólreiðamann

Lögreglumenn hlupu uppi ölvaðan karl um þrítugt sem reyndi að komast undan á stolnu reiðhjóli í miðbæ Reykjavíkur í gær. Sökum ölvunar átti maðurinn í mestu erfiðleikum með að halda jafnvægi á hjólinu og var för hans stöðvuð á Laugavegi.

Þá voru fjórir ökumenn teknir fyrir ölvunarakstur á höfuðborgarsvæðinu í gær og nótt. Þetta voru þrír karlar, einn um tvítugt og tveir á sextugsaldri, og ein kona á fertugsaldri. Þrír ökumenn voru teknir fyrir að aka undir áhrifum fíkniefna. Það voru allt karlar. Einn er 18 ára en hinir tveir eru á þrítugsaldri.

Til viðbótar stöðvaði lögreglan för fjögurra karla í umferðinni í gær en hinir sömu höfðu allir sest undir stýri þrátt fyrir að hafa þegar verið sviptir ökuleyfi, segir í tilkynningu frá lögreglunni.