,,Allt gáfað og vel gert fólk mun hafa gaman af Næturvaktinni"

Gamanþáttaröðin Næturvaktin hefur göngu sína á Stöð 2 á sunnudag. Þættirnir verða sýndir vikulega og eru tólf talsins. Þeir Jón Gnarr, Pétur Jóhann Sigfússon, Jörundur Ragnarsson og Jóhann Ævar Jóhannsson sömdu handritið en Ragnar Bragason leikstýrir.

Jón segir að allt gáfað og vel gert fólk komi til með að hafa gaman af þáttunum en um leið á vitlausu og illa gerðu fólki eftir að leiðast.

Sögusvið þáttanna er bensínstöð Skeljungs við Laugarveg og gerast þeir allir þar innandyra. "Sögusviðið er þröngt en um leið þrungið átökum og dramatík," segir Jón. Í hverjum þætti verða gestaleikarar og mun frægu fólki úr samtímanum bregða fyrir."

Þeir Jón Gnarr, Pétur Jóhann og Jörundur fara með aðalhlutverkin en Jóhann Ævar kemur við sögu í einum þætti. "Fólk er farið að rýna svo svakalega vel í sjónvarpið nú orðið, það starir alveg á skjáinn, samanber símaauglýsingamálið umtalaða. Ég á því von á að það eigi eftir að koma auga á Jóhann í hlutverki sínu," segir Jón þegar hann er spurður hvort verið sé að skilja einn handritshöfundinn útundan.