Britney var ógreidd á MTV-verðlaunahátíðinni

Britney Spears tók kast á hárgreiðslumanni sínum rétt áður en hún átti að stíga á svið og flytja opnunaratriðið á MTV-verðlaunahátíðinni á sunnudag. Hún brjálaðist þegar hún sá útkomuna hjá hárgreiðslumanninum og þurfti læknir að útvega henni róandi.

Britney vill helst fá konur til að greiða sér og þegar hárgreiðslumeistarinn Ken Paves mætti á svæðið lét hún óánægju sína í ljós. Það endaði með því að Paves fór án þess að vera búinn að setja í hana hárlengingar. Britney sturtaði síðan í sig pillum sem róuðu hana ef til vill um of enda var hún hálf frosin á sviðinu.

Þá hefur Britney verið gagnrýnd fyrir hversu léttklædd hún var á sviðinu en hún mun hafa valið klæðnaðinn sjálf í stað þess að þiggja ráð fagmanna. Hún gerði sér þó strax að loknu atriðinu grein fyrir mistökunum og hljóp baksviðs á eftir æpandi uppyfir sig að hún hafi litið út eins og feitt svín.