Lúxussjávarafurðafyrirtæki komið í þrot

Fyrirtæki sem framleitt hefur sæeyru við Eyjafjörð er gjaldþrota. Öllum starfsmönnum hefur verið sagt upp.

Sæeyru eru í hópi dýrustu sjávarafurða og var fyrirtækið Haliotis á Hauganesi stofnað fyrir sex árum til að ala sæeyraungviði og selja í aðrar áframeldisstöðvar. Síðan keyptu Stokkfiskur, Tækifæri og einstaklingar félagið og ríkti bjartsýni um mikinn útflutning.

En allt kom fyrir ekki. Í fyradag var öllum þremur starfsmönnum fyrirtækisins sagt upp og Ásgeir Guðnason framkvæmdastjóri staðfestir að fyrirtækið sé komið í þrot. Spurður um ástæður gjalþrotsins segir Ásgeir að meira fjármagn hafi vantað og skort hafi þolinmæði í markaðsmálunum. Niðurstaðan sé dapurleg því allt hafi gengið upp í eldinu sjálfu.

Enn eitt höggið í fiskeldinu er því staðreynd hér á landi. Samkvæmt heimildum Stöðvar 2 eru þó þreifingar í gangi um endurreisn, enda liggja mikil verðmæti í lager fyrirtækisins. Þar ræðir um tugi milljóna samkvæmt heimildum fréttastofu.