Erlendir ferðamenn eyða þriðjungi meira en í fyrra

Gjaldeyristekjur af ferðamönnum jukust verulega á öðrum fjórðungi ársins miðað við sama tímabil í fyrra eftir því sem segir í frétt frá Ferðamálastofu. Þar er vitnað í tölur frá Seðlabankanum sem sýni að neysla ferðamanna hafi aukist um nærri þriðjung, úr ellefu milljörðum króna í rúma 14 á tímabilinu.

Ferðamálastofa bendir á að þegar rýnt sé nánar í tölurnar komi í ljós að neysla á hvern ferðamann hækki úr ærri 76.600 krónum í nærri 81 þúsund krónur, eða um nærri 6 prósent á milli ára. Þegar horft sé sjö ár aftur í tímann hafi neyslan hins vegar aukist um 20 prósent.