Veiða má rjúpu í mánuð, hámark 38.000 fugla

Umhverfisráðherra hefur ákveðið að rjúpnaveiðitímabilið í ár standi frá 1. til 30. nóvember. Mælt er með því að veiddir verði að hámarki 38.000 fuglar. Áfram mun ríkja sölubann á rjúpum og rjúpnaafurðum. Ákvörðunin byggir á mati Náttúrufræðistofnunar Íslands á veiðiþoli rjúpnastofnsins og mati Umhverfisstofnunar á heildarveiði árið 2006.

Í tilkynningu frá ráðuneytinu segir m.a að rjúpum fækkar nú annað árið í röð frá síðasta uppsveifluskeiði, en það stóð aðeins yfir í tvö ár samanborið við fjögur til fimm ár í fyrri uppsveiflum rjúpnastofnsins. Að mati Náttúrufræðistofnunar er áætlaður varpstofn 2007 um 110.000 fuglar og er það fækkun um 70.000 fugla frá því í fyrra.

Við mat á veiðiþoli er miðað við að hlutföll unga í veiðistofni verði 79% það sama og talningar sýndu síðsumars 2007. Stærð veiðistofns 2007 er metin um 440.000 fuglar og með því mælt að ekki verði veiddir fleiri en 38.000 fuglar í ár.

Miðað við fyrri reynslu af rjúpnastofninum í niðursveiflum, mun rjúpum fækka næstu þrjú til fjögur árin og veiðiþol stofnsins minnka að sama skapi. Það er því ljóst að takmarka þarf rjúpnaveiði enn frekar í ár en gert hefur verið á síðustu árum.

Sigmar B. Hauksson formaður Skotveiðifélags Íslands segir að ekki sé nema gott eitt um þessa ákvörðun að segja. "Við erum að vísu óánægðir með að stöðugt skuli verið að breyta dagsetningum á veiðitímabilinu," segir Sigmar í samtali við Vísi. "Við höfum því lagt til að þessi dagsetning nú gildi fyrir næstu þrjú árin."