Kyrrsetningar á Dash 8 hafa ekki áhrif á flugvélakaup Gæslunnar

Ný flugvél Landhelgisgæslunnar sem pöntuð hefur verið, er af svipaðri gerð og þær vélar sem nú hafa verið kyrrsettar um allan heim. Gæsluvélin er af gerðinni Dash 8 300, en vélarnar sem kyrrsettar hafa verið eru Dash 8 400. Fjármálastjóri gæslunnar segir málið engin áhrif hafa á kaupin á nýju vélinni.

Þórhallur Hákonarson, fjármálastjóri Landhelgisgæslunnar, segir þær vélar sem um ræðir vera lengri en nýja gæsluvélin. Hann segir að ef til þess komi að um mögulega galla í lendingarbúnaði geti verið að ræða í gæsluvélinni tryggi samningar að það komi ekki að sök. Gæslan fái vélina eftir um það bil tvö ár, málið sé í eðlilegum farvegi og verið sé að klára smíðalýsingu.

„Í samningnum er kveðið á um að komi eitthvað þessu líkt upp, það er að segja mögulegir gallar, þá ber framleiðandanum að laga vélina fyrir afhendingu," segir Þórhallur. Hann bendir einnig á að ekki sé hægt að bera saman Dash 8 farþegavél og vél gæslunnar sem verður sérútbúin til björgunarstarfa. „Það er eins og að kalla Econoline sendibílinn sjúkrabíl," segir hann.