Orkuveitan rukkar milljónir fyrir verk sem áður voru unnin án gjalds

Gunnar segir málið ekki snúast um gjaldskrá Orkuveitunnar en upplýsingafulltrúi OR hefur sagt í fjölmiðlum að hann skilji ekki hvað bæjarstjórinn eigi við þar sem engar gjaldskrárbreytingar hafi verið gerðar. „Þetta mál snýst ekki um gjaldskránna heldur hvað það kostar að fá fyrirtækið til þess að færa til strengi sem þarf að flytja úr stað," segir Gunnar. Hann segir að hingað til hafi þetta verið gert án endurgjalds nema um stórar aðgerðir hafi verið að ræða. „Undanfarið hefur það hins vegar verið þannig að þegar við biðjum um færslu á strengjum til þess að þeir lendi ekki undir þegar verið er að leggja nýja vegi, þá krefjast þeir stórra upphæða fyrir viðvikið." Gunnar segist ekki vilja nefna nákvæmar tölur í þessu sambandi en hann segir að um margar milljónir sé að ræða.

Gunnar bendir á að strengir og rör á vegum Orkuveitunnar liggi víða um bæinn og að fyrirtækiið hafi hingað til ekki greitt krónu fyrir það til Kópavogsbæjar. Hann veltir því einnig upp hvort til greina komi fyrir bæinn að stofna Rafveitu Kópavogs. „Það er ekkert mál fyrir okkur að stofna eigin rafveitu. Nú þegar búið er að skilja á milli framleiðslu og flutnings á raforku þá er ekkert sem segir að við getum ekki bara dreift þessu sjálfir."

Gunnar segist ekkert hafa á móti hlutafélagavæðingu Orkuveitunnar sem slíkri. „En ef þetta á að verða svona, að menn fari að rukka ótæpilega fyrir allt þá er tími til að staldra við og þess vegna óskaði ég eftir þessum fundi með borgarstjóra," segir Gunnar.