Boðar átak gegn svikafyrirtækjum

Félagsmálaráðneytið hefur óskað eftir því við ASÍ að sambandið komi að eftirlitsátaki og hertum aðgerðum Vinnumálastofnunar vegna fyrirtækja sem ekki hafa skráð erlenda starfsmenn hér á landi og upplýst um réttindi þeirra. Forsvarsmenn AFLs Starfsgreinafélags undirbúa aðgerðir vegna seinagangs stjórnvalda í málinu.

Fram kom í fréttum í gær að Vinnumálastofnun hefði hætt við að stöðva vinnu hjá tveimur undirverktökum Arnarfells við Hraunaveitu Kárahnjúkavirkjunar vegna óskráðra starfsmanna eftir að gögn voru lögð fram í málinu. Þessu mótmælti AFL Starfsgreinasamband harkalega og sagðist ekki treysta Vinnumálastofnun til þess að verja rétt launafólks í landinu. Í svipaðan streng tók Guðmundur Gunnarsson, formaður Rafiðnaðarsambandsins, í pistli á heimasíðu sambandsins.

Fólk búið að fá nóg

Sverrir Albertsson, framkvæmdastjóri AFLs, sagði í samtali við Vísi fyrr í dag að áratugir væru síðan verkalýðsfélögin hefðu gripið til aðgerða sem væru utan ramma laganna en nú nú væri mælirinn fullur. „Það er kominn tími til aðgerða. Fólk er búið að nóg af undanlátssemi Vinnumálastofnunar. Innan byggingariðnaðarins er verið að ráðast að lífskjörum fólks. Okkar félagsmönnum er sagt að ef þeir sætti sig ekki við tiltekin laun geti fyrirtækin vel ráðið erlenda verkamenn á kjörum undir samningum," segir Sverrir. Hann segist hafa farið ásamt formanni sambandsins um Austurland og alls staðar hvetji menn félagið til þess að grípa til aðgerða. Sverrir vildi þó ekki gefa upp til hvers konar aðgerða yrði gripið eða hvenær.

AFL benti á í yfirlýsingu í gær að fresturinn sem félögin sem um ræddi væri veittur á grundvelli launaseðla sem gefnir eru út af starfsmannaleigunni Nordic Construction line SIA. Hún væri ekki með skráða starfsmenn samkvæmt vef Vinnumálastofnunar. Sverrir segir Vinnumálastofnun handónýta og ekki verði leitað frekar til hennar. AFL vonist eftir yfirlýsingu frá félagsmálaráðherra í málinu.

Ekki annað liðið en að fyrirtæki fylgi lögum

Tilkynning barst frá félagsmálaráðuneytinu í eftirmiðdaginn þar sem fram kemur að efnt verði til eftirlitsátaks í samstarfi við ASÍ og Vinnumálastofnun vegna rökstudds gruns um að fjöldi fyrirtækja hafi rangt við. Þar segir einnig að samhliða vinnu starfshóps á vegum ráðuneytisins í málinu hafi ráðherra mælst til þess að Vinnumálastofnun hefji þegar vinnu við afmörkuð verkefni sem lúta að eftirlitinu, að skýr skilaboð verði gefin út um að ekki verði annað liðið en að fyrirtæki, innlend sem erlend, virði íslensk lög. Viðurlögum verði beitt með markvissum og samræmdum hætti eftir því sem ástæða sé til.

Tryggja eigi að erlendir starfsmenn búi við sambærileg kjör og aðbúnað og íslenskir starfsmenn og að ekki sé brotinn á þeim réttur samkvæmt gildandi lögum, reglum og kjarasamningum hér á landi. Félagsmálaráðherra mun funda með fulltrúum ASÍ og Vinnumálastofnunar um málið.