Gjaldtökur bankanna eru komnar framúr öllu hófi

Jóhannes Gunnarsson formaður Neytendasamtakanna fagnar þeirri ákvörðun viðskiptaráðherra að mynda nefnd um gjaldtökur bankanna af viðskiptavinum sínum. "Þessar gjaldtökur eru framúr öllu hófi að okkar mati og því tímabært að reyna að koma böndum á þær," segir Jóhannes.

Jóhannes segir að þótt gjöld sem bankarnir taka af svokölluðum fit-kostnaði, færslugjöld, innheimtukostnaður, lántökugjöld og fleira séu mjög svipuð hjá öllum vilji hann ekki taka svo djúpt í árinni að segja að um samráð um Þetta sé að ræða hjá bönkunum. "Enda væri slíkt brot á lögunum um samkeppni," segir hann. "En það er alltaf hætta á slíku til staðar í þeirri fákeppni sem er á markaðinum."

Jóhannes bendir á að í Noregi hafi verið sett sérstök löggjöf um hvað bankar þar í landi mega taka í gjöld af viðskiptavinum sínum. "Við viljum gjarnan sjá svipaða löggjöf hérlendis," segir hann. Neytendasamtökin eiga fulltrúa í fyrrgreindri nefnd sem hefur störf á næstu dögum. Henni er ætlað að skila áliti fyrir áramót.