Hafa afsalað sér hlutverki sínu

Samfylkingin hefur afsalað sér því hlutverki að vera höfuðandstæðingur Sjálfstæðisflokksins í íslenskum stjórnmálum, segir formaður Vinstri grænna. Hann skaut föstum skotum á Samfylkinguna á flokksráðsfundi Vinstri grænna í dag en sagði Sjálfstæðisflokkinn þó áfram höfuðandstæðinginn.

Flokksráðsfundur Vinstri-grænna kom saman til fundar á Hótel Flúðum í dag. Tilgangur fundarins var meðal annars að ræða nýtt landslag í íslenskum stjórnmálum en þetta er fyrstu fundur flokksráðsins eftir Alþingiskosningar.

Steingrímur J. Sigfússon, formaður flokksins, sagði í ræðu sinni að Vinstri-grænir hafi tekið afgerandi stöðu sem þriðji stærsti stjórnmálaflokkurinn eftir kosningar í vor þar sem flokkurinn hafi bætt verulega við fylgi sitt. Tilfinningar flokksmanna hafi verið blendnar eftir kosningar þar sem sigurinn hafi ekki verið eins stór og margir vonuðust til og vonbrigði hafi verið að flokkurinn hafi ekki komist í ríkisstjórn.

Hann gerði einnig að umtalsefni ásakanir um að hann hefði sjálfur klúðrað því að flokkurinn hafi náð að tryggja sér sæti í ríkisstjórn. Hann sagðist efast um að nokkru hefði breytt ef hann hefði gert eitthvað á annan hátt. Sterk öfl innan Sjálfstæðisflokksins og Samfylkingarinnar hafi unnið ötullega að því bak við tjöldin fyrir kosningarnar að mynda ríkisstjórn.

Steingrímur skaut föstum skotum að Samfylkingunni sem hann sagði hafa skort úthald og kjark til að varðveita þá stöðu flokksins að vera eiginlegt mótvægi við Sjálfstæðisflokkinn. Hann sagði Sjálfstæðisflokkinn þó áfram vera höfuðandstæðing Vinstri-grænna en ekki Samfylkinguna og lofaði öflugri stjórnarandstöðu. Vinstri-grænir væru tilbúnir að taka til varna ef einkavæðingarvaltarinn fer næst að rúlla yfir heilbrigðismálin.