Allt að milljarður króna í íþróttamannvirki á Selfossi

Sveitarfélagið Árborg ætlar að verja allt að milljarði króna í endurnýjun og uppbyggingu íþróttamannavirkja á Selfossi á næstu árum. Framundan er undirbúningur fyrir landsmót árið 2012.

Framundan eru þrjú meginverkefni við uppbyggingu og endurnýjun íþróttamannvirkja á Selfossi. Ætlunin er að fara í stórfelldar endurbætur á sundlaug og áform eru um þær hefjist á næsta ári. Jafnframt er gert ráð fyrir að hafist verði handa við endurnýjun á knattspyrnuvellinum auk þess sem aðstaða til frjálsra íþrótta verður gerð eins og best er hérlendis. Ætlunin er að knattspyrnuvöllurinn verði tilbúinn næsta sumar. Þá á að byggja fjölnota íþróttahús á Selfossi.

Ragnheiður Hergeirsdóttir bæjarstjóri Árborgar segir að ekki sé endanlega fastsett hversu mikið fé fari í þennan málaflokk en ljóst sé að hér sé um gríðarlegt átak að ræða. Að öllum líkindum verði ráðstafað hálfum til einum milljarði króna til íþróttamannvirkja fram til ársins 2012.

Minnihlutinn í bæjarstjórn Árborgar lagði fram tillögu í vikunni þess efnis að þegar yrði hafist handa við byggingu fjölnotahússins en sú tillaga var felld af meirihlutanum. Ragnheiður segir að meiri tíma þurfi til að vinna að undirbúningi málsins áður en tekin verður ákvörðun um stærð hússins og framkvæmd við byggingu þess.