Óljóst hvað ríkisstjórnin stendur fyrir

Ríkisstjórnin hefur setið við völd í hundrað daga. Stjórnmálafræðingur segir stjórnina hafa farið vel á stað, en formaður Vinstri-grænna segir óljóst hvað ríkisstjórnin standi fyrir.

Ríkisstjórn Sjálfstæðisflokksins og Samfylkingarinnar tók við völdum 24. maí síðastliðinn. Ein stærsta ákvörðun ríkisstjórnarinnar á þeim rúmu þremur mánuðum sem hún hefur setið við völd er veruleg skerðing þorskkvóta. Einar Mar Þórðarson stjórnmálafræðingur segir ríkisstjórnina hafa farið vel á stað. Steingrímur J. Sigfússon, formaður Vinstri-grænna, segir hins vegar ríkisstjórnina hafa gert lítið. Fyrstu þrír mánuðir ríkisstjórnarinnar hafi sýnt að stjórnarsáttmáli flokkanna sé óljós og erfitt að sjá hvað ríkisstjórnin standi fyrir.