OR selur Landsneti flutningsvirki sín

Landsnet hefur undirritað samning við Orkuveitu Reykjavíkur um kaup á flutningsvirkjum í eigu Orkuveitunnar. Kaupverðið er 1,3 milljarðar en það er greitt með 900 milljónum króna í reiðufé en 400 milljónum í hlutafé sem jafngildir um átta prósenta hlut í Landsneti.

Fram kemur í tilkynningu frá Orkuveitunni að meðal eigna sem Orkuveitan selur Landsneti sé rafstengur frá Nesjavallavirkjun að tengivirkinu við Korpu, Akraneslína auk ýmiss búnaðar í tengivirkjum.

Við kaupin hefur Landsnet eignast allt meginflutningskerfi landsins en fyrir skemmstu keypti félagið flutningsvirki Hitaveitu Suðurnesja. Breytingar urðu á raforkumálum árið 2005 þegar þau voru markaðsvædd og flutningskerfi raforkunnar var falið Landsneti til rekstrar. Var orkufyrirtækjum boðið að selja Landsneti flutningsvirki sín og fá greitt í reiðufé eða hlutafé.