Bókaútgáfurisi orðinn til með sameiningu JPV og Eddu

Undirrituð hefur verið viljayfirlýsing um að bókadeild Eddu útgáfu, sem Mál og menning er að kaupa og JPV útgáfa verði sameinuð í einu útgáfufyrirtæki. Mun félagið hljóta nafnið Forlagið. Árni Einarsson forstjóri Eddu segir að þetta hafi borið mjög brátt að, raunar innan síðasta sólarhrings. "Við stefnum að sterkri alhliða bókaútgáfu," segir Árni.

Í fréttatilkynningu um málið segir m.a. að "í viljayfirlýsingunni segir að markmið aðila sé að mynda öflugt fyrirtæki á sviði bókaútgáfu og að aðilar séu sammála um að eignarhlutföll hluthafahópa verði jöfn í hinu nýja félagi."

Árni Einarsson mun láta af störfum sem forstjóri Eddu en taka sæti í stjórn hins sameinaða félags. Ákveðið hefur verið að Jóhann Páll Valdimarsson verði útgefandi félagsins, Egill Örn Jóhannsson framkvæmdastjóri og Halldór Guðmundsson stjórnarformaður.