Forstjóri OR sendir starfsfólki bréf um að hafa ekki áhyggjur

Guðmundur Þóroddsson forstjóri Orkuveitunnar hefur sent öllu starfsfólki sínu bréf þar sem það er beðið að hafa ekki neinar áhyggjur af áformum um hlutafélagsvæðingu fyrirtækisins. „Hugsanleg breyting á félagsformi Orkuveitunnar hefur engin áhrif á réttindi, skyldur eða kjör þín sem starfsmanns fyrirtækisins,“ segir Guðmundur m.a. í bréfinu.

Í bréfinu bendir Guðmundur á að við stofnun OR árið 1999 var ákveðið að fyrirtækið yrði sameignarfélag. „Slík félög eru einkaréttarlegs eðlis og þá þegar var, í góðri samvinnu við stéttarfélög, gengið frá nauðsynlegum breytingum samfara því að starfsfólk OR var ekki lengur opinberir starfsmenn,“ segir Guðmundur.

Fram kemur m.a. í bréfinu að Guðmundur álíti breytingu á félagsforminu mikið hagsmunamál fyrirtækisins.