Grunuð um aðild að meintum kynferðisbrotum Guðmundar

Helga Haraldsdóttir, eiginkona Guðmundar Jónssonar, fyrrverandi forstöðumanns Byrgisins, er grunuð um að hafa tekið þátt í meintum kynferðisbrotum eiginmanns síns gagnvart konum sem dvöldu á meðferðarheimilinu og hefur verið yfirheyrð af lögreglu í tengslum við málið.

Átta konur sem dvöldu í Byrginu kærðu Guðmund Jónsson, fyrrverandi forstöðumann Byrgisins, fyrir kynferðisbrot og hefur málið verið til rannsóknar hjá Sýslumanninum á Selfossi frá áramótum.

Að sögn Þorgríms Óla Sigurðssonar aðstoðaryfirlögregluþjóns hjá lögreglunni á Selfossi hefur Helga Haraldsdóttir, eiginkona Guðmundar, verið kölluð til yfirheyrslu hja lögreglu og grunuð um hlutdeild í meintum brotum Guðmundar. Hann segir að rannsókn málsins hafi leitt í ljós að talin hafi verið ástæða til að yfirheyra hana sem sakborning.

Mál Guðmundar og konu hans eru nú til rannsóknar hjá sýslumannsembættinu á Selfossi og er stefnt að því að rannsókn ljúki í næstu viku. Þaðan fer málið til ríkissaksóknara.