Þúsundir vopna bíða eyðingar á Suðurnesjum

Tilraunir Íslendinga til að smygla ólöglegum vopnum til landsins hafa aukist stórlega. Flóran í vopnum hefur auk þess aukist mikið. Nokkur þúsund vopn eru nú í geymslu hjá Tollgæslunni á Suðurnesjum sem bíða eyðingar.

„Fólk gerir sér ekki almennt grein fyrir því að þessi vopn eru oft stórhættuleg og geta orðið að skaðræðitólum höndum þeirra sem kunna ekki með að fara," segir Kári Gunnlaugsson, aðaldeildarstjóri tollgæslunnar á Suðurnesjum. Kári og hans menn hafa lagt hald á mikinn fjölda vopna á árinu og fullyrðir Kári að smygl Íslendinga á ólöglegum vopnum færist mjög í vöxt.

Hann segir að oft séu þessi vopn keypt sem skraut en í öðrum tilkvikum sé ekki gott að meta hver tilgangurinn sé með kaupunum. Sum vopn séu þó þess eðlis að ekki verði annað séð en þau eigi að nota til að hóta fólki eða til að beita með þeim ofbeldi.

Kári segir að oft sé um stórhættuleg skotvopna að ræða. Skotfærin séu í sumum tilvikum stórhættulegar stálkúlur sem geti valdið verulegum skaða, jafnvel bana. Vopnin eru í stórum haugum hjá Toillgæslunni í Keflavík og bíða nú eyðingar en þeim er eytt reglulega að sögn Kára.

Einungis í sumar hefur Tollgæslan á Suðurnesjum lagt hald á 300 ólögleg vopn. Í vopnahaugnum eru hnúajárn, kasthnífar, veiðihnífar, kaststjörnur, kylfur og sverð af fjölbreyttum toga.

Meintir innflytjendur á þessum ólöglega varningi geta lokið málum sínum í Flugstöðinni með dómsátt þar sem lagt er hald á vopnin en sektir eru á bilinu tíu til tuttugu þúsund krónur fyrir hvert vopn. Menn eru því að borga upp undir hundrað þúsund krónur í sekt.