Gunnar segir bústaðsbrunann mikið áfall

Gunnar Birgisson, bæjarstjóri í Kópavogi, staðfesti í samtali við Vísi að sumarbústaðurinn sem brann til grunna í Grímsnesi í morgun hafi verið í hans eigu. Gunnar segir þetta mikið áfall fyrir fjölskylduna enda um griðastað hennar að ræða. Hann segir mikið af persónulegum munum hafa verið í bústaðnum.

Gunnar var mjög daufur í dálkinn og sagði lögreglu kanna eldupptök. Enginn hefur verið í bústaðnum síðan á sunnudaginn síðastliðinn.

Eldsprenging varð í bústaðnum þegar reykkafarar Brunavarna Suðurlands ætluðu að ráðast til inngöngu snemma í morgun til að ganga úr skugga um hvort einhver væri þar inni. Þá sakaði ekki. Bústaðurinn stóð skammt frá vegamótum Biskupstungnabrautar og Þingvallavegar.